بھیا غریب زینبؑ تیرا کفن نہ لا ئی
بھیا غریب زینبؑ تیرا کفن نہ لا ئی
لاشِ حسینؑ پر ہے زینبؑ کی یہ دہائی
مثلِ بتولؑ حق سے محروم ہوں میں اب تک
شبیرؑ تیرے غم میں مغمون ہوں میں اب تک
تڑپا رہی ہے مجھ کو عباسؑ کی جدائی
افسوس کہ سکینہؑ نازوں سے جو پلی ہے
جو تم کو یاد کر کے زنداں میں چل بسی ہے
اُسکو ملی نہ بھیا زندان سے رہائی
ہم پر ستم اے بھیا ڈھاتے رہے ستم گر
سیدانیوںؑ کے سر میں آتی تھی خاک اُڑ کر
بازار کا وہ منظر زینبؑ نہ بھول پائی
بالوں سے منہ چھپا کر بازار میں گئی تھی
نرغے میں اشکیہ کے بے پردہ میں کھڑی تھی
گزری ہے کیا بہن پر کیسے بتاؤں بھائی
سجادؑ کے یہ دل پر دشوار مرحلہ تھا
زنجیر کو سنبھالے بیمار رو رہا تھا
آلِ نبیﷺ کُھلے سر دربار میں جو آئی
سب سے بڑی مصیبت کیا ہے کسی نے پوچھا
بیمار سر جُھکا کر روتے ہوئے یہ بولا
بہنوں کا شام جانا زینبؑ کی بے ردائی
اِس ایک سانحے پر اکثر محبؔ نے پوچھا
برباد ہو گیا جب آلِ نبیﷺ کا کنبہ
بعدِ حسینؑ کیوں آخر باقی رہی خدائی
