عاشور کی شب کرتے تھے اصحاب یہ نوحہ
عاشور کی شب کرتے تھے اصحاب یہ نوحہ
ہم کیسے چلے جائیں تمہیں چھوڑ کے مولاؑ
کُوزے لیئے ہاتھوں میں ہیں معصوم سے بچے
ان پیاسوں کو پانی کی بڑی آس ہے ہم سے
مر جائیں گے یہ گر ہمیں جاتے ہوئے دیکھا
مانا کہ ضرورت نہیں حضرتؑ کو ہماری
عباسؑ سا بھائی ہے حفاظت کو تمہاری
زہراؑ کو مگر پھر بھی ہے منہ ہم نے دکھانا
آنکھوں میں نظر آتی ہے بچی کی غریبی
ڈرتی ہے کہ تنہائی نہ بڑھ جائے پدر کی
آ آ کے ہمیں تکتی ہے حسرت سے سکینہؑ
جس روز سے آباد کیا تم نے یہ جنگل
اِک بی بی ؑ یہاں روتی ہے راتوں کو مسلسل
لگتا ہے لحد چھوڑ کے خود آئی ہے زہراؑ
کیا عالمِ غُربت نبیﷺ ذادی پہ پڑا ہے
کہنے کی نہیں بات مگر ہم نے سُنا ہے
ہے آپ کی زینبؑ کو بہت ہم پہ بھروسہ
سینہ علی اکبرؑ کا بہت چُوم رہے ہو
جو تم پہ گزرتی ہے وہ معلوم ہے ہم کو
ہم لوگ بھی تو صاحبِ اولاد ہیں آقاؑ
اکبرؔ جو دئیے خیمے میں غازیؑ نے جلائے
تھا ایسا سماء شہہؑ کے بھی آنسو نکل آئے
تلوار گلے پر رکھے ہر شخص تھا کہتا
ہم کیسے چلے جائیں تمہیں چھوڑ کے مولاؑ
