لوٹ کے آ جا میرے بھائی

دیتی تھی صغراؑ یہ دھائی

لوٹ کے آ جا میرے بھائی

تم مجھے لے جاؤ گے یہ وعدہ کیا تھا

تم مجھے لے جانے نہیں آئے ہوا کیا

ہائے بہت دیر لگائی

راستہ تکتی ہوئی مر جائیگی بہنا

تیرے بنا اب نہیں جی پائے گی بہنا

سہہ نہیں سکتی میں جدائی

بیٹھی ہوئی در پہ کبھی کرتی یہ نوحہ

ہائے میرا بھائی ابھی تک نہیں آئے

کوئی خبر بھی نہیں آئی

پھرتا ہیں اِن آنکھوں میں اب تک تیرا چہرہ

ایک بھی پل ایسا نہیں گزرا ہے بھیا

جب کہ تیری یاد نہ آئے

میں تو ہر ایک وقت تیرے غم میں ہوں روتی

مجھکو میرے بھائی خبر ہی نہیں ہوتی

کب ہوا دن رات کب آئی

روتا ہوا ایسا مجھے چھوڑ گیا تو

رُکتے نہیں بھائی میری آنکھوں سے آنسو

ایسی گھٹا درد کی چھائی

جینے کی اب کوئی مجھے آس نہیں ہے

کوئی بھی اے بھائی میرے پاس نہیں ہے

مجھ پہ ترس کھا میرے بھائی

گوہرِؔ دلگیر یہی لب پہ تھا نوحہ

ہائے یہی کہتے ہوئے مر گئی صغراؑ

لوٹ کے آ جا میرے بھائی