دی تھی اماں نے جو پوشاک وہ لا دو زینبؑ
دی تھی اماں نے جو پوشاک وہ لا دو زینبؑ
اپنے ہاتھوں سے کفن مجھ کو پنہا دو زینبؑ
آج مقتل میں فقط بات تمہاری ہو گی
ابھی اماں سے ملاقات ہماری ہو گی
کوئی پیغام اگر ہے تو سُنا دو زینبؑ
ہاتھ پابندِ رسن بہنا تمہارے ہوں گے
مجھ کو رہ رہ کے خیال آتا ہے لاشے سے میرے
تیر کس طرح نکالو گی بتا دو زینبؑ
میرے لاشے کی رہے گی تمہیں پہچان بہن
چاک کر دو میرے کُرتے کا گریبان بہن
کوئی لوٹے نہ اسے ایسا بنا دو زینبؑ
سامنے اپنے سکینہؑ سے اُتروا لو گوہر
ابھی کچھ دیر میں لُٹ جائے گا مظلوم کا گھر
یہ امانت کسی گوشے میں چُھپا دو زینبؑ
باہر آنے کو نہ خیمے سے میں کہتا تم کو
ہوتے عباسؑ تو تکلیف نہ دیتا تم کو
بن کے عباسؑ مجھے زیں پہ بٹھا دو زینبؑ
قید خانے کی سنبھالو یہ امانت بی بیؑ
گود میں لو اسے مظلوم ہو رُخصت بی بیؑ
میرا دامن میری بچی سے چُھڑا دو زینبؑ
جب سے اکبرؑ گئے بینائی بھی آنکھوں کی گئی
لا کے دے دو علی اصغرؑ کی نشانی کوئی
کُرتا بے شیر کا آنکھوں سے لگا دو زینبؑ
گھر سے شبیرؑ جنازے کی طرح سے نکلے
سب ہی روتے تھے تکلمؔ درِ خیمہ پہ کھڑے
شہہؑ نے جس دم کہا مرنے کی رضا دو زینبؑ
